అక్కినేని 102వ జయంతి సందర్భంగా అలరించిన ‘పాడవోయి భారతీయుడా...’
కిన్నెర ఆర్ట్ థియేటర్స్ ఆధ్వర్యంలో ఘనంగా సినీ సంగీత విభావరి
హైదరాబాద్, ట్రైనెట్ న్యూస్, సెప్టెంబర్ 22:
దాదాసాహెబ్ ఫాల్కే అవార్డు గ్రహీత, పద్మవిభూషణ్, నటసామ్రాట్ డా. అక్కినేని నాగేశ్వరరావు 102వ జయంతిని పురస్కరించుకుని కిన్నెర ఆర్ట్ థియేటర్స్ ఆధ్వర్యంలో నిర్వహించిన ‘పాడవోయి భారతీయుడా...’ అక్కినేని సినీ సంగీత విభావరి మంగళవారం ఘనంగా జరిగింది.
హైదరాబాద్ చిక్కడపల్లిలోని శ్రీ త్యాగరాయ గానసభ, కళా సుబ్బారావు కళావేదికలో సాయంత్రం నిర్వహించిన ఈ కార్యక్రమంలో అక్కినేని నటించిన చిత్రాల్లోని చిరస్మరణీయ గీతాలను ప్రముఖ గాయనీ గాయకులు ఆలపించి ప్రేక్షకులను అలరించారు. పాతతరం సినీ సంగీత మాధుర్యాన్ని గుర్తుచేసిన పాటలకు ప్రేక్షకుల నుంచి విశేష స్పందన లభించింది.
కార్యక్రమానికి పూర్వ జిల్లా న్యాయమూర్తి, భారత సుప్రీంకోర్టు న్యాయవాది శ్రీ నేరెళ్ళ మల్లాది ముఖ్య అతిథిగా హాజరయ్యారు. సినీ విజ్ఞాన విశారద శ్రీ యస్.వి. రామారావు గౌరవ అతిథిగా పాల్గొన్నారు. కార్యక్రమాన్ని శ్రీ వై.ఎస్. రామకృష్ణ సమర్పించారు.
ఈ సందర్భంగా వక్తలు అక్కినేని నాగేశ్వరరావు తెలుగు సినీ రంగానికి అందించిన విశిష్ట సేవలను స్మరించుకున్నారు. నటనలో సహజత్వం, క్రమశిక్షణ, కళారంగంపై అంకితభావంతో ఆయన తరతరాలకు ఆదర్శంగా నిలిచారని పేర్కొన్నారు. అక్కినేని చిత్రాల్లోని సుప్రసిద్ధ గీతాలతో సాగిన సంగీత విభావరి ఆద్యంతం ఆహూతులను ఆకట్టుకుంది.
