ఆయుష్మాన్ ఆరోగ్య మందిరాలు, ఏబీ–పీఎంజేఏవై, ఈ–సంజీవని సేవలను ప్రపంచానికి పరిచయం చేసిన భారత్
1.8 లక్షలకు పైగా ఆయుష్మాన్ ఆరోగ్య మందిరాలు, 90 కోట్లకు పైగా ప్రత్యేక ఆరోగ్య గుర్తింపు సంఖ్యలు, 49.7 కోట్లకు పైగా టెలీ కన్సల్టేషన్లతో సార్వత్రిక ఆరోగ్య సంరక్షణ దిశగా భారత్ ముందడుగు: కేంద్ర ఆరోగ్య శాఖ కార్యదర్శి
2030 నాటికి హెపటైటిస్ నిర్మూలన దిశగా భారత్ సాధించిన పురోగతిని వివరించిన కేంద్ర ఆరోగ్య శాఖ కార్యదర్శి పుణ్య సలిల శ్రీవాస్తవ
యూఎన్‌జీఏ-81లో ‘వన్‌ఎస్‌సీడీ’ ప్రారంభానికి ప్రపంచ భాగస్వాములతో చేతులు కలిపిన భారత్
సికిల్ సెల్ వ్యాధిపై సమగ్ర కార్యాచరణ, 2047 నాటికి నిర్మూలన లక్ష్యాన్ని వివరించిన భారత్
న్యూఢిల్లీ, సెప్టెంబర్ 24:
అందరికీ నాణ్యమైన ఆరోగ్య సేవలను అందుబాటు ధరల్లో చేరువ చేయాలనే తన నిబద్ధతను భారత్ మరోసారి స్పష్టం చేసింది. ప్రజారోగ్య వ్యవస్థలను బలోపేతం చేయడంతోపాటు ప్రాధాన్య ఆరోగ్య సమస్యలను ఎదుర్కొనేందుకు చేపడుతున్న చర్యలను ప్రపంచ దేశాలతో పంచుకుంది. న్యూయార్క్‌లో జరిగిన 81వ ఐక్యరాజ్యసమితి సాధారణ సభ (యూఎన్‌జీఏ-81) సందర్భంగా నిర్వహించిన రెండు కీలక అంతర్జాతీయ ఆరోగ్య సమావేశాల్లో భారత్ తన అనుభవాలను వివరించింది.
సార్వత్రిక ఆరోగ్య సంరక్షణ, ప్రపంచ ఆరోగ్య మిత్రదేశాల బృందం నిర్వహించిన ఏడో వార్షిక మంత్రివర్గ సమావేశంలో కేంద్ర ఆరోగ్య శాఖ కార్యదర్శి పుణ్య సలిల శ్రీవాస్తవ పాల్గొన్నారు. సమగ్ర ప్రాథమిక ఆరోగ్య సేవల నుంచి ద్వితీయ, తృతీయ స్థాయి వైద్య సేవల వరకు ఆరోగ్య సంరక్షణ వ్యవస్థను బలోపేతం చేసేందుకు భారత్ చేపడుతున్న చర్యలను ఆమె వివరించారు. వైద్య ఖర్చుల కారణంగా ప్రజలు ఆర్థిక ఇబ్బందులకు గురికాకుండా రక్షణ కల్పిస్తున్నట్లు తెలిపారు.
దేశవ్యాప్తంగా 1.8 లక్షలకు పైగా ఏర్పాటు చేసిన ‘ఆయుష్మాన్ ఆరోగ్య మందిరాల’ ద్వారా విస్తృత స్థాయి వైద్య సేవలను ప్రజలకు చేరువ చేస్తున్నట్లు ఆమె పేర్కొన్నారు. వీటి ద్వారా పునరుత్పత్తి, మాతా–శిశు ఆరోగ్య సేవలు, అసంక్రమిత వ్యాధుల నిర్ధారణ–నిర్వహణ, మానసిక ఆరోగ్యం, వృద్ధుల సంరక్షణ, ఉపశమన చికిత్సలతోపాటు వ్యాధుల నివారణ, ఆరోగ్య పరిరక్షణ, చికిత్స సేవలను అందిస్తున్నట్లు వివరించారు. ప్రాథమిక ఆరోగ్య సేవల్లో నాణ్యతా ప్రమాణాలకు నిరంతరం ప్రాధాన్యం ఇస్తున్నామని స్పష్టం చేశారు.
ప్రభుత్వ నిధులతో అమలవుతున్న ఆరోగ్య భరోసా పథకం ‘ఆయుష్మాన్ భారత్–ప్రధానమంత్రి జన ఆరోగ్య యోజన’ (ఏబీ–పీఎంజేఏవై) ద్వారా సమాజంలోని బలహీన, వెనుకబడిన వర్గాలకు ఆర్థిక రక్షణను బలోపేతం చేస్తున్నట్లు శ్రీవాస్తవ తెలిపారు. రోగులపై వైద్య ఖర్చుల భారాన్ని తగ్గించడంలో ‘ఉచిత మందులు, రోగ నిర్ధారణ సేవల కార్యక్రమం’, ‘ప్రధానమంత్రి జాతీయ డయాలసిస్ కార్యక్రమం’ కీలకంగా నిలుస్తున్నాయని చెప్పారు. ఈ కార్యక్రమాలు అత్యవసర వైద్య సేవలను ప్రజలకు మరింత అందుబాటులోకి తీసుకొస్తున్నాయని పేర్కొన్నారు.
సమన్వయంతో కూడిన నిరంతర ఆరోగ్య సంరక్షణ వ్యవస్థ ప్రాధాన్యాన్ని ఆమె వివరించారు. ఆయుష్మాన్ ఆరోగ్య మందిరాల ద్వారా అందించే సమగ్ర ప్రాథమిక ఆరోగ్య సేవలను ద్వితీయ, తృతీయ స్థాయి వైద్య సేవలతో అనుసంధానిస్తున్నట్లు తెలిపారు. అవసరమైన రోగులను ఉన్నత వైద్య కేంద్రాలకు పంపించే పటిష్ఠమైన రిఫరల్ వ్యవస్థ కూడా దీనికి తోడ్పడుతోందన్నారు.
వ్యాధుల నివారణ, ఆరోగ్య పరిరక్షణ, చికిత్స సేవలను ప్రజలకు చేరువ చేయడంతోపాటు అవసరమైన సమయంలో ప్రత్యేక వైద్య సేవలు అందేలా చూడటమే భారత్ అనుసరిస్తున్న సమగ్ర ఆరోగ్య విధానం ప్రధాన లక్ష్యమని కేంద్ర ఆరోగ్య శాఖ కార్యదర్శి పేర్కొన్నారు.
