సమ్మిళిత విద్యపై దేశవ్యాప్తంగా అవగాహన కార్యక్రమం

60 వేలకుపైగా పాఠశాలల్లో ప్రత్యేక పాఠ్యాంశం ప్రదర్శన

ఇప్పటికే 72 లక్షల మందికిపైగా ఉపాధ్యాయులకు అవగాహన

న్యూఢిల్లీ, అక్టోబరు 8 (ట్రైనెట్ న్యూస్):

ప్రత్యేక అవసరాలున్న చిన్నారులకు సురక్షితమైన, అందుబాటులో ఉండే, సహాయక పాఠశాల వాతావరణాన్ని కల్పించేందుకు కేంద్ర విద్యాశాఖ దేశవ్యాప్తంగా అవగాహన కార్యక్రమం నిర్వహించింది. పాఠశాల విద్య, అక్షరాస్యత విభాగం ఆధ్వర్యంలో ‘ప్రశస్త్‌’ పోర్టల్‌ ద్వారా సమ్మిళిత విద్యపై రూపొందించిన 30 నిమిషాల అవగాహన, పరిచయ పాఠ్యాంశాన్ని పాఠశాలల్లో ప్రదర్శించారు. ఈ కార్యక్రమంలో 60 వేలకుపైగా పాఠశాలలు పాల్గొన్నాయి. ఈ నెలలో మరిన్ని పాఠశాలలు భాగస్వామ్యం కానున్నట్లు విద్యాశాఖ తెలిపింది.

ప్రత్యేక అవసరాలున్న విద్యార్థుల అవసరాలను ఉపాధ్యాయులు, ప్రత్యేక విద్యా బోధకులు, బోధనేతర సిబ్బంది అర్థం చేసుకునేలా ఈ పాఠ్యాంశాన్ని రూపొందించారు. ఆచరణాత్మక ఉదాహరణలు, పరస్పర భాగస్వామ్య కార్యకలాపాల ద్వారా చిన్నారులతో గౌరవప్రదంగా వ్యవహరించడం, వారికి తగిన సహకారం అందించడంపై మార్గనిర్దేశం చేస్తున్నారు. పాఠశాల అధిపతులు, ఉపాధ్యాయులతోపాటు ఆయాలు, వాహన చోదకులు, కార్యాలయ సిబ్బంది, స్వాగత విభాగ సిబ్బంది, విద్యా విభాగాధిపతులు, వసతిగృహ పర్యవేక్షకుల కోసం రూపొందించిన ఈ పాఠ్యాంశం 12 భారతీయ భాషల్లో అందుబాటులో ఉంది.

గత మూడు నెలలుగా ప్రశస్త్‌ ద్వారా సాధారణ ఉపాధ్యాయులకు సమ్మిళిత విద్యపై నిరంతర అవగాహన కల్పిస్తున్నట్లు విద్యాశాఖ పేర్కొంది. ప్రత్యేక పాఠ్యాంశం ద్వారా ఇప్పటికే 72 లక్షల మందికిపైగా ఉపాధ్యాయులకు అవగాహన కల్పించినట్లు వెల్లడించింది.

దివ్యాంగుల హక్కుల చట్టం–2016 పరిధిలోని వైకల్యాలు ఉండే అవకాశం ఉన్న చిన్నారులను ప్రాథమికంగా గుర్తించేందుకు ప్రశస్త్‌ పాఠశాల ఆధారిత డిజిటల్‌ సాధనంగా ఉపయోగపడుతోంది. ఇందులోని రెండు భాగాల పరిశీలన జాబితా ద్వారా విద్యార్థుల్లో కనిపించే సూచనలను ఉపాధ్యాయులు నమోదు చేస్తారు. ప్రత్యేక విద్యా బోధకులు వాటిని పరిశీలించి, అవసరమైన సందర్భాల్లో వైద్య మూల్యాంకనం కోసం సిఫారసు చేస్తారు.

సమ్మిళిత విద్య పాఠశాలలోని ప్రతి ఒక్కరి సమష్టి బాధ్యత అని విద్యాశాఖ స్పష్టం చేసింది. తరగతి గది, కార్యాలయం, రవాణా, ఉమ్మడి ప్రదేశాల్లో చిన్నారులకు ఎదురయ్యే ప్రతి అనుభవం వారి భాగస్వామ్యాన్ని ప్రభావితం చేస్తుందని పేర్కొంది. జాతీయ విద్యా విధానం–2020, దివ్యాంగుల హక్కుల చట్టం–2016కు అనుగుణంగా సమాన అవకాశాలు, అందుబాటు, సమ్మిళిత విద్యను బలోపేతం చేసే ప్రయత్నాల్లో భాగంగా ఈ కార్యక్రమాన్ని చేపట్టినట్లు తెలిపింది.