న్యూఢిల్లీ, అక్టోబర్ 9 (ట్రైనెట్ న్యూస్):
భారత్‌–సింగపూర్‌ సమగ్ర వ్యూహాత్మక భాగస్వామ్యాన్ని మరింత బలోపేతం చేయడం, పెట్టుబడులు–వ్యాపార సహకారాన్ని విస్తరించడం లక్ష్యంగా కేంద్ర ఆర్థిక, కార్పొరేట్‌ వ్యవహారాల మంత్రి నిర్మలా సీతారామన్‌ సింగపూర్‌ అధికారిక పర్యటన చేపట్టారు. అక్టోబర్ 9 నుంచి 11 వరకు జరిగే పర్యటనలో సింగపూర్‌ అగ్రనేతలు, వ్యాపార ప్రముఖులు, అంతర్జాతీయ సంస్థాగత పెట్టుబడిదారులతో సమావేశం కానున్నారు.
పర్యటనలో సింగపూర్‌ అధ్యక్షుడు థర్మన్‌ షణ్ముగరత్నం, ప్రధానమంత్రి లారెన్స్‌ వాంగ్‌, ఉప ప్రధానమంత్రి గాన్‌ కిమ్‌ యోంగ్‌, విదేశాంగ మంత్రి డాక్టర్‌ వివియన్‌ బాలకృష్ణన్‌తో నిర్మలా సీతారామన్‌ భేటీ కానున్నారు. భారత్‌–సింగపూర్‌ మంత్రుల రౌండ్‌టేబుల్‌ సమావేశం (ఐఎస్‌ఎంఆర్‌) నిర్ణయాలను ముందుకు తీసుకెళ్లడంపై చర్చించనున్నారు. వాణిజ్యం, పెట్టుబడులు, డిజిటల్‌ ఆర్థిక అనుసంధానం, మూలధన మార్కెట్లు, పన్నులు, సెమీకండక్టర్లు, అధునాతన తయారీ, నైపుణ్యాభివృద్ధి, విమానయాన రంగాల్లో సహకారం ప్రధాన అంశాలుగా ఉండనున్నాయి.
భారత్‌కు అత్యధిక విదేశీ ప్రత్యక్ష పెట్టుబడులు అందిస్తున్న దేశం సింగపూర్‌ అని కేంద్ర ఆర్థిక మంత్రిత్వ శాఖ తెలిపింది. ఏప్రిల్‌ 2000 నుంచి మార్చి 2026 వరకు సింగపూర్‌ నుంచి భారత్‌కు వచ్చిన మొత్తం ఎఫ్‌డీఐ సుమారు 194.68 బిలియన్‌ అమెరికన్‌ డాలర్లుగా పేర్కొంది. సింగపూర్‌కు చెందిన జీఐసీ, టెమాసెక్‌ వంటి సంస్థాగత పెట్టుబడిదారులు భారత ఆర్థిక వ్యవస్థలోని వివిధ రంగాల్లో గణనీయమైన పెట్టుబడులు కలిగి ఉన్నాయని వివరించింది.
పెట్టుబడిదారులతో చర్చల్లో భాగంగా హెడ్జ్‌ ఫండ్‌, పోర్ట్‌ఫోలియో ఫండ్‌ మేనేజర్లతో నిర్వహించే వ్యాపార రౌండ్‌టేబుల్‌లో ఆర్థిక మంత్రి పాల్గొననున్నారు. ప్రభుత్వం–వ్యాపార సంస్థల మధ్య సమావేశాలు కూడా జరగనున్నాయి. భారత వృద్ధి ప్రస్థానం, పెట్టుబడి అవకాశాలు, మారుతున్న అంతర్జాతీయ ఆర్థిక పరిస్థితులపై ఈ సమావేశాల్లో అభిప్రాయాలు పంచుకోనున్నారు.
జీఐసీ, టెమాసెక్‌, డీబీఎస్‌ బ్యాంక్‌, స్టాండర్డ్‌ చార్టర్డ్‌, బ్రిటిష్‌ ఇంటర్నేషనల్‌ ఇన్వెస్ట్‌మెంట్‌, ఐహెచ్‌హెచ్‌ హెల్త్‌కేర్‌, ఎంయూఎఫ్‌జీ ఆసియా–పసిఫిక్‌, బీ క్యాపిటల్‌, హెచ్‌పీఎస్‌ ఇన్వెస్ట్‌మెంట్‌ పార్ట్‌నర్స్‌ సంస్థల సీఈఓలతో ఆమె విడివిడిగా సమావేశం కానున్నారు. ఎస్‌ఈబీ చైర్‌పర్సన్‌, మిత్సుయి సంస్థ బోర్డు డైరెక్టర్‌, టీపీజీ ఎగ్జిక్యూటివ్‌ చైర్మన్‌, వ్యవస్థాపక భాగస్వామితోనూ భేటీలు జరగనున్నాయి.
నేషనల్‌ ఇన్వెస్ట్‌మెంట్‌ అండ్‌ ఇన్‌ఫ్రాస్ట్రక్చర్‌ ఫండ్‌ (ఎన్‌ఐఐఎఫ్‌), గిఫ్ట్‌ సిటీ వంటి వేదికల ద్వారా సింగపూర్‌ పెట్టుబడిదారుల భాగస్వామ్యాన్ని పెంచుకునే అవకాశాలున్నాయని మంత్రిత్వ శాఖ పేర్కొంది. ఆసక్తిగల పెట్టుబడిదారులను భారత కంపెనీలు, ఆర్థిక సంస్థలు, రాష్ట్ర ప్రభుత్వాలతో అనుసంధానించి, గుర్తించిన పెట్టుబడి అవకాశాలను ముందుకు తీసుకెళ్లేందుకు అవసరమైన సహకారం అందించనున్నట్లు తెలిపింది.
