తదుపరి జాతీయ చలనచిత్ర అవార్డుల కోసం ఉత్తమ పర్యాటక ప్రాంతాలను ప్రతిపాదించండి: రాష్ట్రాలకు కేంద్ర మంత్రి అశ్విని వైష్ణవ్ ఆహ్వానం

తదుపరి జాతీయ చలనచిత్ర అవార్డుల కోసం ఉత్తమ పర్యాటక ప్రాంతాలను ప్రతిపాదించండి: రాష్ట్రాలకు కేంద్ర మంత్రి అశ్విని వైష్ణవ్ ఆహ్వానం

కాన్ఫరెన్స్ హాళ్లకే పరిమితం కాకుండా ప్రజల మధ్యకు జాతీయ చలనచిత్ర అవార్డులు: అశ్విని వైష్ణవ్

న్యూఢిల్లీ, ట్రైనెట్ న్యూస్,సెప్టెంబర్ 22, 2026:

దేశంలోని అత్యుత్తమ పర్యాటక ప్రాంతాలకు జాతీయ స్థాయి కార్యక్రమాలను తీసుకెళ్లాలన్న ప్రధానమంత్రి శ్రీ నరేంద్ర మోదీ దృక్పథం స్ఫూర్తితో జాతీయ చలనచిత్ర అవార్డుల కార్యక్రమాలను దేశంలోని ప్రముఖ పర్యాటక ప్రాంతాల్లో నిర్వహించేందుకు చర్యలు తీసుకుంటున్నట్లు కేంద్ర సమాచార, ప్రసార శాఖ మంత్రి అశ్విని వైష్ణవ్ తెలిపారు.

మీడియాతో మాట్లాడుతూ అశ్విని వైష్ణవ్, “గౌరవ ప్రధానమంత్రి శ్రీ నరేంద్ర మోదీ గారి స్ఫూర్తితో జాతీయ చలనచిత్ర అవార్డులను దేశంలోని అత్యుత్తమ పర్యాటక ప్రాంతాలకు తీసుకెళ్తున్నాం” అని చెప్పారు.

ఏక్తా నగర్ ప్రపంచవ్యాప్తంగా గుర్తింపు పొందిన ప్రముఖ పర్యాటక ప్రాంతంగా మారిందని ఆయన పేర్కొన్నారు. ప్రపంచంలోనే అత్యంత ఎత్తైన సర్దార్ వల్లభ్‌భాయ్ పటేల్ విగ్రహం అక్కడ ఉండటం ప్రత్యేక ఆకర్షణగా నిలుస్తోందన్నారు.

ఇలాంటి ప్రఖ్యాత పర్యాటక ప్రాంతాన్ని భారత రాష్ట్రపతితో పాటు దేశవ్యాప్తంగా ఉన్న భారతీయ చలనచిత్ర రంగ ప్రముఖులు సందర్శించడం వల్ల ఆ ప్రాంతం గురించి మరింత మంది తెలుసుకునే అవకాశం ఏర్పడుతుందని, ప్రత్యక్షంగా సందర్శించి అనుభవించే ఆసక్తి కూడా పెరుగుతుందని తెలిపారు.

జాతీయ చలనచిత్ర అవార్డులను కేవలం కాన్ఫరెన్స్ హాళ్లకు పరిమితం చేయకుండా ప్రజలకు మరింత చేరువ చేయడం, అదే సమయంలో పర్యాటక రంగాన్ని ప్రోత్సహించడం తమ లక్ష్యమని మంత్రి వివరించారు.

జాతీయ చలనచిత్ర అవార్డుల నిర్వహణకు తమ రాష్ట్రాల్లోని అత్యుత్తమ పర్యాటక ప్రాంతాలను గుర్తించి ప్రతిపాదనలు పంపాలని అన్ని రాష్ట్రాలను అశ్విని వైష్ణవ్ ఆహ్వానించారు.

రాష్ట్రాలు సమర్పించే ప్రతిపాదనల్లో అత్యుత్తమ సదుపాయాలతో పాటు, ప్రతిపాదిత పర్యాటక ప్రాంతం 360 డిగ్రీల సమగ్ర అభివృద్ధికి సంబంధించిన ప్రణాళిక కూడా ఉండాలని ఆయన సూచించారు.

ఎంపికైన రాష్ట్రం ప్రతిపాదించిన పర్యాటక ప్రాంతంలో తదుపరి జాతీయ చలనచిత్ర అవార్డుల కార్యక్రమాన్ని నిర్వహిస్తామని తెలిపారు.

ప్రధానమంత్రి నరేంద్ర మోదీ ఆధ్వర్యంలో భారత్ జీ20 సమావేశాలకు ఆతిథ్యం ఇచ్చిన సందర్భాన్ని మంత్రి గుర్తుచేశారు. అప్పుడు జీ20 కార్యక్రమాలను దేశంలోని వివిధ ప్రాంతాలకు తీసుకెళ్లి, అనేక రాష్ట్రాల్లో నిర్వహించారని తెలిపారు.

అదే విధంగా సినిమా రంగం, పర్యాటక రంగాన్ని ఎలా అనుసంధానించవచ్చనే విస్తృత ఆలోచనలో భాగంగానే జాతీయ చలనచిత్ర అవార్డులను కూడా దేశంలోని వివిధ ప్రాంతాల్లో నిర్వహించే ప్రయత్నం చేస్తున్నట్లు చెప్పారు.

సినిమా, పర్యాటక రంగాలను ఒకే వేదికపైకి తీసుకురావడం వల్ల సంబంధిత పర్యాటక ప్రాంతానికి ప్రయోజనం కలుగుతుందని అశ్విని వైష్ణవ్ తెలిపారు. అదే సమయంలో జాతీయ చలనచిత్ర అవార్డులు కాన్ఫరెన్స్ హాళ్లకే పరిమితం కాకుండా దేశంలోని వాస్తవ పర్యాటక ప్రదేశాలకు చేరుకుని ప్రజలకు మరింత దగ్గరవుతాయని ఆయన పేర్కొన్నారు.